Në takimin me aleatët e Federatës së Opozitës së Bashkuar, Sali Berisha ashpërsoi qëndrimin ndaj qeverisë, duke e lidhur krizën politike me mungesën e kushteve për zgjedhje të lira dhe duke theksuar se opozita po përgatit propozimet për reformën zgjedhore.
“Ne jemi mbledhur sot për të përcaktuar se cili është sistemi më i drejtë dhe më funksional zgjedhor për vendin tonë, dhe çdo propozim që hartojnë ekspertët tanë do t’i dërgohet komisionit të reformës zgjedhore me transparencë të plotë. Por dua ta them qartë: me Edi Ramën në pushtet nuk mund të flitet për zgjedhje të vërteta. Ky regjim ka ngritur një mur krimi që bllokon vullnetin qytetar dhe i mohon shqiptarëve të drejtën për të zgjedhur të lirë.
Ne zgjodhëm të mos braktisim betejën, edhe pse e dimë se zgjedhjet nën këtë qeveri nuk janë të barabarta. Këtë e kanë treguar të gjitha episodet e vjedhjes dhe presionit mbi votuesit, të cilat drejtësia i ka mbyllur me heshtje. Prandaj, përpara nesh qëndron një detyrë historike: të çmontojmë këtë sistem të deformimit elektoral, të mbrojmë votën dhe t’u japim shqiptarëve mundësinë të besojnë përsëri tek procesi demokratik. Asnjë reformë s’ka kuptim, nëse nuk garantohet që zgjedhjet të mos kontrollohen nga krimi dhe pushteti,” shprehet Berisha.
