Sot mbahet seanca e radhës për dosjen “Veliaj”, ku të pandehur janë kryebashkiaku i Tiranës, Erion Veliaj, bashkëshortja e tij Ajola Xoxa dhe 28 të tjerë, përfshirë persona dhe shoqëri. Në këtë seancë pritet të vazhdojë mbrojtja e Veliajt, Xoxës dhe dy biznesmenëve të akuzuar, Gentjan Sula e Shkëlqim Fusha.
Veliaj ka thënë se nuk është njohur me aktet e dosjes, pasi nuk ka mundur të lexojë USB-në që i është dhënë, duke u ankuar se nuk ka laptop në qeli. Ai ka kërkuar gjithashtu të mos qëndrojë në kafazin e qelqtë në gjyq, por kërkesa e tij u rrëzua nga GJKKO.
Veliaj është në paraburgim që prej shkurtit dhe akuzohet për pastrim parash, korrupsion, shpërdorim detyre dhe futje të sendeve të ndaluara në qeli. Ai e ka quajtur procesin të pabazuar në prova dhe i ka mohuar akuzat.
