Në një deklaratë të fundit, Kryeministri izraelit, Benjamin Netanyahu, ka shprehur mendimin se Presidenti amerikan, Donald Trump, po punon për krijimin e kushteve që mund të çojnë në një marrëveshje të mundshme me Iranin. Sidoqoftë, ai ka theksuar se Izraeli mbetet i rezervuar dhe kërkon që marrëveshja e mundshme të përfshijë disa kushte të rëndësishme për sigurinë e shtetit hebre.Netanyahu, i cili u takua me Trump në Shtëpinë e Bardhë të mërkurën, tha se ai shprehu përgjithësisht “skepticizmin” e tij dhe theksoi se nëse arrihet një marrëveshje më në fund “ajo duhet të përfshijë elementë që konsiderohen shumë të rëndësishëm për Izraelin”, siç janë përfundimi i programit bërthamor të Teheranit, kufizimet në raketat e tij balistike dhe mbështetja e tij për grupet e armatosura si Hezbollahu i Libanit, Hamasi në Gaza dhe Huthi në Jemen.
“Kushtet që po krijon Trump, të kombinuara me faktin se iranianët sigurisht e kuptojnë se bënë një gabim herën e fundit, kur nuk arritën një marrëveshje, mund të lejojnë krijimin e kushteve për arritjen e një marrëveshjeje të mirë,” tha Netanyahu para se të largohej nga Uashingtoni.
“Ne kemi një marrëdhënie shumë të ngushtë, të sinqertë dhe të hapur,” tha Netanyahu, duke vënë në dukje se diskutimi u përqendrua në shumë çështje, por kryesisht në negociatat me Iranin dhe se Trump donte “të dëgjonte pikëpamjen e tij”. “Presidenti beson se iranianët e kanë mësuar tashmë se me kë kanë të bëjnë,” shtoi ai.
