Çmimet e naftës në tregjet ndërkombëtare pësuan një rënie të fortë këtë të hënë, ndërsa bursat kryesore shfaqën shenja rimëkëmbjeje, pas sinjaleve pozitive për ulje tensionesh në Lindjen e Mesme.
Reagimi i tregjeve erdhi pasi Presidenti i Shteteve të Bashkuara, Donald Trump, bëri të ditur se kontaktet e fundit me Iranin kanë qenë konstruktive dhe kanë hapur rrugë për shmangien e një përshkallëzimi të mëtejshëm të konfliktit. Sipas tij, palët kanë zhvilluar bisedime që ai i cilësoi si “shumë të mira dhe produktive”.
Trump theksoi gjithashtu se Shtetet e Bashkuara do të shtyjnë përkohësisht çdo veprim të mundshëm ushtarak ndaj objekteve energjetike iraniane, duke i dhënë hapësirë përpjekjeve diplomatike. Ky zhvillim është interpretuar nga investitorët si një sinjal për ulje të rrezikut gjeopolitik në rajon.
Analistët vlerësojnë se çdo hap drejt dialogut midis palëve ka ndikim të drejtpërdrejtë në stabilitetin e tregjeve globale, veçanërisht në sektorin e energjisë, ku Lindja e Mesme mbetet një zonë kyçe për furnizimin botëror.
