34 persona janë arrestuar në një aksion të Policisë në rajonin e Mitrovicës, Vushtrrisë, Istogut dhe Skenderajt me qëllim të luftimit të veprimtarive të kundërligjshme që ndërlidhen me organizimin e skemave piramidale dhe bixhozit të paligjshëm.
Sipas njoftimit janë kontrolluar rreth 50 lokacione të ndryshme, përfshirë lokale afariste dhe shtëpi private. Janë sekuestruar rreth 170.000 euro para të gatshme dhe 5 automjete.
Gjithashtu janë sekuestruar pajisje dhe materiale të tjera të përdorura për zhvillimin e aktiviteteve të kundërligjshme. Me vendim të prokurorit, 29 të dyshuar janë dërguar në mbajtje, ndërsa të dyshuarit tjerë janë liruar në procedurë të rregullt.
