Kryetari i Partisë Demokratike të Kosovës, Bedri Hamza, ka reaguar ndaj ofertës që i ka bërë kryetari i Lëvizjes Vetëvendosje, Albin Kurti, për ndarjen e pozitave në Kuvendin e Kosovës.
Hamza ka theksuar se kjo ofertë është e papranueshme dhe jo serioze, duke shtuar se PDK-ja ka një qëllim tjetër, atë të kontribuimit në stabilitetin politik të vendit.
“Kryesia e Kuvendit është konstituuar, Kuvendi është i konstituuar, janë zgjedhur dhe janë të votuar. Nuk e kemi kontestuar këtë çështje, nuk jemi duke folur për kryetar të Kuvendit. Nuk kemi shkuar të lypim pozitë as për vetë as për ndonjërin nga anëtarët e Partisë Demokratike. Kemi shkuar që me i dhënë vendit institucione dhe stabilitet politik. Kjo nuk është fare serioze,” deklaroi Hamza para mediave.
