AKP-ja, partia e Presidentit turk Rexhep Tajip Erdogan kërkon t’i japë atij fuqinë për të shpallur një zonë ekonomike ekskluzive që shtrihet deri në 200 milje detare nga bregu i Turqisë pa marrë parasysh ZEE-të potenciale të vendeve të tjera, si Greqia ose Qiproja.
Projektligji që po hartohet nga partia, siç raportohet nga Bloomberg, do ta autorizojë Erdoganin të pohojë të drejtat e Turqisë në çështjet e peshkimit shpimit, si dhe të krijojë parqe detare, madje edhe në ujërat e kontestuara në Egje dhe Mesdheun Lindor.
Lëvizja e Turqisë, vazhdon raporti, synon t’i përgjigjet pretendimeve të Greqisë dhe Qipros ndaj ujërave të pasura me gaz të Mesdheut Lindor dhe të tregojë se Ankaraja nuk mund të lihet mënjanë, thanë burimet me njohuri për çështjen për Bloomberg.
Konventa e Kombeve të Bashkuara mbi Ligjin e Detit u lejon shteteve bregdetare të përcaktojnë ZEE deri në 200 milje detare nga brigjet e tyre. Nëse kjo nuk është e mundur, kërkohet një marrëveshje dypalëshe me vendet me pretendime që mbivendosen.
Turqia, e cila nuk e ka ratifikuar konventën, hedh poshtë qëndrimin e Greqisë se kufijtë e saj detarë përcaktohen nga ishujt e saj të shumtë disa prej të cilëve ndodhen afër bregdetit turk. Përkundrazi, Turqia argumenton se shelfi kontinental duhet të matet nga kontinenti.
Gjithashtu argumenton se shtetet ishullore, si Qiproja, kanë të drejta vetëm brenda ujërave të tyre territoriale ligjore të cilat mund të shtrihen deri në 12 milje detare. Republika Turke e Qipros Veriore pretendon të drejta për çdo burim energjie të zbuluar në brigjet qipriote.
Shtetet e Bashkuara, raporton gjithashtu Bloomberg, i kanë kërkuar Greqisë dhe Turqisë të ruajnë dialogun, ndërsa përballen me dallime në lidhje me eksplorimin e naftës dhe gazit. Bashkimi Evropian më parë ka kërcënuar me sanksione kundër Turqisë për aktivitetet e shpimit në ujërat e diskutueshme, pas presionit nga Greqia dhe Qiproja.
