Presidenti amerikan, Donald Trump, ka zhvilluar një tjetër bisedë telefonike me kryeministrin e Izraelit, Benjamin Netanyahu, në një kohë kur tensionet rreth Iranit vazhdojnë të mbeten të larta. Mediat izraelite raportojnë se kjo ishte telefonata e dytë mes dy udhëheqësve brenda një periudhe të shkurtër.
Sipas raportimeve, diskutimi mes Trump dhe Netanyahu ka zgjatur më shumë se gjysmë ore dhe është fokusuar te zhvillimet e fundit që lidhen me Iranin dhe mundësinë e një përshkallëzimi të ri të situatës në rajon. Burime pranë mediave izraelite kanë lënë të kuptohet se Tel Avivi dhe Uashingtoni po shqyrtojnë me kujdes hapat e ardhshëm.
Menjëherë pas telefonatës, Trump reagoi edhe në rrjetin e tij social Truth Social, ku paralajmëroi Iranin me një mesazh të shkurtër, duke thënë se “koha po ecën”. Deklarata u interpretua nga analistët si një sinjal presioni ndaj Teheranit në mes të klimës së tensionuar politike dhe ushtarake në Lindjen e Mesme.
