Ministri i Drejtësisë, Toni Gogu, këtë të martë gjatë fjalës së tij në prezantimin e rekomandimeve para prokurorit të përgjithshëm, Olsian Çela dhe drejtuesit të (SPAK) Klodian Braho, ka theksuar se kriminaliteti rrugor duhet të trajtohet në fokus të shtuar.
Sipas tij 37% e procedimeve janë me iniciativë nga vetë SPAK dhe se rreth 33 milionë euro pasuri të paligjshme janë sekuestruar.
Nga ana tjetër Gogu ka kërkuar që qeveria të ngrejë një njësi tjetër për hetimin kundër krimit kibernetik.
“Gjatë vitit 2025, ka tendenca që meritojnë vëmendje. Nga SPAK, 37 përqind e procedimeve janë regjistruar nga vetë institucioni, ka një rritje prej gati 20 përqind në raport me 2024. Çështjet e mbartura janë reduktuar ndjeshëm dhe para afatit që kishte vendosur SPAK. Vlera e aseteve të sekuestruara arrin në gati 33 milionë euro. Mbi 50 përqind e zyrtarëve të hetuar nga SPAK janë dërguar në gjykatë. 182 procedime korrupsioni janë nga Prokuroritë e zakonshme. Prokurorë dhe oficerë kanë ndjekur trajnime për të luftuar korrupsionin. Shërbimi prokurorial ka ecur në shumë tregues. Konfiskimet përfundimtare kanë nevojë për vëmendje të shtuar”, shprehet Gogu.
