Prej rreth tre orësh po vijon para Kryeministrisë protesta kundër projektit të ndërtimit në Zvërnec, ku qytetarë, aktivistë dhe ambientalistë kanë kërkuar ndalimin e projektit dhe dorëheqjen e kryeministrit Edi Rama.
Kjo është dita e tretë radhazi e protestave të organizuara për këtë çështje, të cilat nisën pas ngjarjeve të 30 majit në Zvërnec, ku u raportuan përplasje mes qytetarëve dhe punonjësve të një kompanie private sigurie.
Gjatë tubimit, protestuesit kanë refuzuar ftesën e kryeministrit për dialog, duke vijuar me thirrje dhe pankarta kundër qeverisë. Ata shprehen se kundërshtojnë projektin dhe kërkojnë më shumë transparencë mbi zhvillimet që prekin zonën e mbrojtur të Zvërnecit.
Nga ana tjetër, kryeministri Rama ka dënuar dhunën e ushtruar ndaj protestuesve gjatë ngjarjeve të fundit, ndërsa ka mbrojtur investimin, duke argumentuar se projekte të tilla ndikojnë në zhvillimin ekonomik të vendit dhe në rritjen e të ardhurave kombëtare.
