Prokuroria pranë Gjykatës së Shkallës së Parë të Juridiksionit të Përgjithshëm në Shkodër ka urdhëruar ndalimin e Sibuel Durrësi, i dyshuar për veprën penale “vrasje me dashje”, e mbetur në tentativë.
Ngjarja ka ndodhur më 7 qershor 2026 në qytetin e Shkodrës, ku, pas një konflikti dhe nën efektin e alkoolit, dyshohet se i riu ka tentuar të përplasë me automjet disa persona, duke u rrezikuar jetën.
Fillimisht, rasti u raportua si një aksident rrugor nga shërbimet e policisë.
Megjithatë, pas veprimeve hetimore të thelluara dhe pas publikimit të një videoje të ngjarjes në media, Prokuroria ka ndryshuar kualifikimin e rastit, duke e trajtuar si ngjarje të qëllimshme.
