Kryeministri Edi Rama ka reaguar sërish për protestat masive të cilat po mbahen prej ditësh kundra tij dhe gjithë qeverisë.
Në postimin e tij në facebook Rama ka publikuar një video të ditës së djeshme ku shfaqen dy kontraste në sheshin “Skënderbej” në Tiranë, një grup qytetarësh duke shijuar ndeshjen e Kupës së Botës 2026 dhe grupi tjetër i protestuesve i cili u është drejtuar atyre që të ngrihen dhe ti bashkohen revoltës së tyre kundra Kryeministrit dhe qeverisë.
Postimi i Ramës
Një grup vendos se ka të drejtë të frikësojë të tjerët për hir të atdheut. Britma zë vendin e argumentit. Rrethimi zë vendin e dialogut. Intimidimi paraqitet si aktivizëm dhe linçimi publik i tradhëtarëve si drejtësi e Zotit në emër të popullit.
Kështu vepruan lëvizjet ekstremiste në Europën e paraluftës dhe kështu bëjnë edhe sot, duke e rritur eksponencialisht presionin mbi hapësirën demokratike falë rrugëve pa kontroll të internetit.
Kush nuk mendon si turma bëhet objekt i bullizmit masiv online, i fyerjeve, kërcënimeve, linçimit publik dhe fushatave të organizuara të damkosjes. Qëllimi nuk është debati. Qëllimi është heshtja. Të krijohet një klimë ku njerëzit zgjedhin të heshtin, jo sepse nuk kanë ç’të thonë, por sepse kostoja e të folurit bëhet shumë e lartë.
