Dita e 22-të e protestës qytetare përpara Kryeministrisë në Tiranë dhe përgjatë marshimit në rrugët e kryeqytetit u karakterizua nga një atmosferë e qetë, por me mesazhe të forta politike të përcjella përmes ironisë dhe sarkazmës.
Qytetarët dhe të rinjtë pjesëmarrës shpalosën pankarta me përmbajtje kritike ndaj skandaleve të fundit, korrupsionit të pretenduar, propagandës dhe fenomenit të patronazhistëve. Përmes sloganeve kreative dhe shpesh humoristike, protestuesit përcollën pakënaqësinë e tyre ndaj qeverisë dhe kryeministrit Edi Rama.
Në mungesë të incidenteve, protesta vijoi në mënyrë paqësore, ndërsa pjesëmarrësit theksuan se qëllimi i tyre mbetet shprehja publike e shqetësimeve qytetare dhe kërkesa për ndryshime politike.
