Shqipëria ka përmbyllur një tjetër hap në procesin e përafrimit me Bashkimin Evropian në fushën e energjisë, duke përmbushur detyrimet ligjore të Kapitullit 15, pas miratimit të ligjit të ri për sektorin e energjisë elektrike, deklaroi ministri i Infrastrukturës dhe Energjisë, Enea Karakaçi.
“Shqipëria ka miratuar ligjin e sektorit të energjisë elektrike, duke përmbyllur detyrimin që ka në bazë të Kapitullit 15 të energjisë të Bashkimit Evropian. Duke përmbyllur këtë paketë ligjore, Shqipëria bashkë me Malin e Zi janë ndër shtetet që kanë përmbushur të gjitha dispozitat ligjore të sektorit energjetik dhe e vendos vendin tonë në një pozitë shumë përparuese në raport me të gjitha shtetet e rajonit,” u shpreh ministri Enea Karakaçi.
