Gjykata e Posaçme ka përfunduar shqyrtimin gjyqësor për dosjen e vrasjes së ish-oficerit të Policisë së Shtetit, Santiago Malko. Seanca u shoqërua me momente tensioni pas deklaratave të të pandehurit Ilir Selmanaj.
Para trupit gjykues, Selmanaj ka mohuar çdo përfshirje në ngjarjen e gushtit 2019, duke deklaruar se nuk ka lidhje me atentatin ndaj Malkos.
Deklarata e tij solli reagimin emocional të familjarëve të viktimës, ndërsa nëna e Santiago Malkos e akuzoi atë për vrasjen e të birit dhe kërkoi dënimin e tij.
Pas mbylljes së procesit të shqyrtimit, trupi gjykues është tërhequr për të dhënë vendimin, i cili pritet të shpallet më 17 korrik.
Selmanaj akuzohet nga organi i akuzës për përfshirje në ngjarjen kriminale ku mbeti i vrarë ish-efektivi i policisë, Santiago Malko.
