Presidentja e Kosovës, Vjosa Osmani është takuar sot sërish me Emisarin Special të ShBA-së Gabriel Escobar në ditën e fundit të vizitës së tij në Kosovë. Osmani tha në takim me diplomatin amerikan ka shprehur përkushtim e palëkundur të Kosovës për marrëdhëniet mes dy shteteve.
“U takova sot me Zëvendësndihmës Sekretarin e Shtetit, Gabriel Escobar, në ditën e fundit të vizitës së tij në Kosovë. Shpreha përkushtimin tonë të palëkundër për marrëdhëniet Kosovë-ShBA dhe pres me padurim që të rrisim bashkëpunimin në fushat me interes të përbashkët”, ka shkruar Osmani.
Escobar i shoqëruar nga Emisari i BE-së, Miroslav Lajcak, kanë qëndruar në Kosovë që nga e hëna ku kanë zhvilluar takime me liderët institucionalë e politikë në vend.
Qëllimi i vizitës së tyre është shtyrja përpara e një takimi të nivelit të lartë në kuadër të dialogut Kosovë-Serbi. Dy emisarët sot do të udhëtojnë për në Beograd ku do të takohen me presidentin serb, Aleksander Vucic.
/5pyetjet.al
