Përveç pagës që marrin deputetët e Kuvendit të Kosovës që është më e lartë në krahasim me pagën minimale në nivel vendi, ata gëzojnë edhe përfitime tjera financiare derisa ushtrojnë mandatin e deputetit, siç janë mbulimet e shpenzimit të karburantit.
Gjatë kësaj jave janë publikuar shpenzimet e deputetëve të Kosovës për udhëtime në seancat e Kuvendit.
Një listë me emrat e deputetëve të Kuvendit të Kosovës, të cilët kanë marrë qindra euro nga shteti për shpenzime të udhëtimit, ka ngjallur reagime të shumta. Shpenzimin e këtyre parave, disa prej tyre e kanë arsyetuar se “kështu është e paraparë me rregullore”, shkruan Gazeta Express.
Publikimi bëri shumë bujë duke krijuar reagime për shpenzime të panevojshme, derisa deputetët e VV-së u zotuan se nuk do të përdorin më para për shpenzime në karburant gjatë udhëtimeve.
Reagime të shumta pati nga shoqëria civile që ka kërkuar të kursehet para publike. Madje, një zyrtar policor reagoi kundër këtyre shpenzimeve, por ai u suspendua nga puna për shkak të komenteve të tij.
Kanal 10 ka publikuar edhe emrat e deputetëve të cilët nuk e kanë shfrytëzuar të drejtën për përfitime në karburant.
Këta janë të gjithë deputetët e opozitës që nuk figurojnë në listën e atyre që kanë përfituar nga shpenzimet për udhëtim në dy muajt e fundit të vitit 2021. Qytetet në grafikë janë vendlindjet e deputetëve, siç janë regjistruar në Kuvend.
