Presidenti francez Emmanuel Macron dhe homologu i tij rus Vladimir Putin ranë dakord sot në një bisedë telefonike për nevojën për të gjetur një zgjidhje diplomatike për krizën ukrainase, njoftoi sot presidenca franceze. Të dy ranë dakord sot të bëjnë gjithçka që është e mundur për të arritur shpejt një armëpushim në Ukrainën lindore.
Ministrat e Jashtëm të dy vendeve do të takohen në ditët në vijim me këtë qëllim dhe do të punojnë për mbajtjen e një samiti të mundshëm në nivelin më të lartë me Rusinë, Ukrainën dhe aleatët për të vendosur një rend të ri sigurie në Evropë, shtoi presidenca franceze.
Më herët, Kremlini njoftoi se presidenti rus dhe homologu i tij francez kishin diskutuar nevojën për të përshpejtuar kërkimin e zgjidhjeve diplomatike për krizën e përshkallëzuar në Ukrainën lindore gjatë një bisede telefonike të dielën.
Sipas Kremlinit, Putin i tha Macronit se përshkallëzimi i fundit ishte rezultat i veprimeve të forcave të Kievit. “Presidenti rus ka thënë se provokimet e forcave ukrainase janë arsyeja e përshkallëzimit”, tha Kremlini, duke shtuar se në një deklaratë Putin kishte shprehur “shqetësim të madh” për përshkallëzimin përgjatë vijës së kontaktit në Ukrainën lindore.
/5pyetjet.al
