Kryeministri Edi Rama prezantoi sot paketën e ndihmës ekonomike që përfshin ndihmën për pensionistët, familjet në nevojë që marrin ndihmë ekonomike, indeksim e pensioneve, hyrjen në fuqi të pagës minimale në Prill.
“Sot kemi miratuar paketën për të përballuar goditjen pa rritur çmimin për familjet dhe biznesin e vogël dhe kompensuar goditjen për çmimet e shportës për ata që janë më pak të mbrojtur” tha Rama.
Ai deklaroi se taksat e naftës nuk do të hiqen. “Taksat e naftës nuk do të hiqen dhe këtë nuk ka protestë me drita iPhoni dhe bllokim rrugësh me goma X5 që e zhbën. Taksat e naftës nuk do të hiqen sepse çmimi i energjisë nuk do të rritet”, ka theksuar kreu i qeverisë”.
PAKETA ME 7 PIKA;
1- 3.6 miliardë lekë ose 36 milionë USD, për indeksimin e menjëhershëm të pensioneve. Kjo masë do të reflektohet që në pensionin e radhës së 673.542 pensionistëve.
2- Për 434 mijë përfitues, do të kompensojmë me lekë në dorë rritjen e çmimeve të shportës, e cila bazuar në përllogaritjen e INSTAT-it është 7% ose e kthyer në rritje mbi konsumin mesatar të llogaritur përpara goditjes, është 25 mijë lekë të vjetra.
Qeveria do të japë 30 mijë lekë të vjetra, për 3 muaj rresht, për këto kategori:
– Pensionistë që marrin më pak sesa gjysma e pagës minimale
– Pensionistë të invaliditetit
– Pensionistë që jetojnë vetëm
– Persona me aftësi të kufizuar, paraplegjikë, tetraplegjikë apo të verbër
– Të gjitha familjet që janë aktualisht në skemën e ndihmës ekonomike
3- Mbështetja për fermerët me naftë pa taksa do të shkojë në 1.4 miliardë lekë ose 14 milionë USD, me një shtesë plus prej 5 milionë USD e cila do të derdhet menjëherë.
4 – Qeveria do të mbështesë të gjithë shqiptarët që përdorin linjat urbane, qytetase dhe ndërqytetase, duke derdhur menjëherë 500 milionë lekë ose 5 milionë dollarë, për të paguar diferencën e çmimit të biletës, në mënyrë që asnjë udhëtar të mos preket nga ndryshimi i çmimit.
5 – Afrojmë dy muaj përpara futjen në fuqi të ligjit për zerimin e taksës mbi pagat deri në 400 mijë lekë të vjetra, përgjysmimin e taksës mbi pagat deri në 500 mijë lekë të vjetra, si edhe uljen e takses mbi pagat nga 1.5 deri në 2 milionë të reja.
Këto masa lehtësuese do të reflektohen në pagat e prillit dhe prej tyre do të përfitojnë 360 mijë të punësuar.
Numri i të punësuarve në Shqipëri që paguajnë zero taksë mbi pagën, arrin një shifër që s’e ka askush në rajon, 56%!
6 – Afrojmë dy muaj përpara edhe futjen në fuqi të ligjit për pagën minimale, e cila në prill do të bëhet 320 mijë lekë të vjetra.
7 – Shtojmë me 20 miliardë lekë të reja ose 200 milionë USD, financimin e mburojës së çmimit të energjisë për konsumatorët familjarë dhe biznesin e vogël.
