Presidentja Vjosa Osmani i ka dërguar një letër homologut të Shteteve të Bashkuara të Amerikës, Joe Biden, ku i ka kërkuar ndihmën e Uashingtonit për t’u anëtarësuar në NATO.
Në letër thuhet se anëtarësimi i Kosovës në NATO në këto rrethana aktuale është e një rëndësie të veçantë dhe urgjente.
Ajo thotë se si presidente e Kosovës, e di që SHBA, politika e jashtme dhe interesat kombëtare janë për një Evropë të lirë dhe në paqe dhe integrimi i Ballkanit Perëndimor është thelbësor në këtë drejtim.
Osmani në letrën e dërguar presidentit Biden shkruan se Kosova vazhdimisht po i ekspozohet kërcënimeve nga Rusia, e po ashtu edhe Ballkani Perëndimor.
“Duke pasur parasysh këtë ne shprehim besimin tonë që SHBA-të do të përdorë lidershipin dhe ndikimin që aktivisht të ndihmojë dhe shtyjë para anëtarësimin e Kosovës në mekanizmat e NATO-s”, thuhet në letër.
Presidentja Osmani i ka kërkuar presidentit Biden një takim për t’i forcuar marrëdhëniet Kosovë-SHBA.
