E kërkonin në të gjithë Shqipërinë dhe jashtë, por Nuredin Dumani deri mbrëmjen e djeshme jetonte i qetë me qira në lagjen “Apollonia” në Fier së bashku me një vajzë, e cila ishte e huaj dhe që bashkëjetonte prej disa kohësh.
Dumani u gjet brenda kësaj banese i plagosur, pasi disa orë më parë i ishte bërë atentat në Papër të Elbasanit, duke udhëtuar me automjet. Sipas deklaratave të fqinjëve, Dumani e kishte marrë me qira këtë banesë para një jave. Ajo thotë se pak ditë më parë i kishte shkuar Dumanit tek banesa dhe i kishte kërkuar që të mos bënin zhurmë.
“Unë banoj në kat të tretë, ngjarja ka ndodhur në kat të katërt. Vetëm dëgjoja mbrëmë policët që i binin derës me mjete të forta për të hapur derën. Tmerr, u tmerruam. Ata rrinë me qira në fakt. U trokita para 3 ditëve, mos më bëni zhurmë u thashë se jam me tension nuk duroj dot. Na fal, na thanë.
Ai që doli ishte rreth 45 vjeç. Pastaj më erdhi për së dyti e më trokiti mua. Unë thashë po ky pse më trokiti prapë? Tha, dëgjo nuk jam unë që bëj zhurmë, është ai lart tha. Epo mirë na fal i thashë unë, që të bezdisa”, tregon një banore e këtij pallati.
Nuredin Dumani ishte një nga më të kërkuarit e policisë, pasi konsiderohet si i përfshirë në shumë ngjarje kriminale dhe vrasje të ndodhur vitet e fundit. Ai konsiderohet edhe si rival i Talo Çelës, një tjetër i shumëkërkuar nga policia shqiptare, i cili vijon të jetë ende në arrati.
