Ministrja e shtetit për marrëdhëniet me Parlamentin, Elisa Spiropali, e cila është një nga tre anëtarët e PS-së, që Edi Rama ka caktuar në grupin negociator me opozitën për zgjedhjen e presidentit të ri ka injoruar Sali Berishën.
Dy ditë më parë nga Shkodra, Sali Berisha tha se nuk do të votojë kandidatët e Ramës dhe se PD nuk ka asnjë emër. “Nuk kam një emër për President për të propozuar.
Opozita nuk propozon emra. Nuk votojmë kandidatët e Edi Ramës. Kjo do të thotë të çojmë në presidencë kopjen e tij. Konsensusi me Edi Ramën është të puthesh me judën” tha ai.
Por Elisa Spiropali e ka injoruar. “Sali Berisha është vetpërjashtuar nga një proces ku nuk e ka ftuar askush dhe ku askush nuk ka pasur asnjë plan për ta ftuar! Procesi i zgjedhjes së Presidentit të Republikës nuk parashikon pjesëmarrjen e të vdekurve që nuk vdesin”, shkruan Spiropali.
Sot media raportoi për takimin e parë të tre anëtarëve të PS-së me Enkelejd Alibeajn, por ky i fundit e mohoi.
