N/kryetari i PD-së, Luçiano Boçi i kërkon kryetares së Kuvendit, Lindita Nikolla që të fusë në rendin e ditës së parlamentit, kërkesën e opozitës për debat lidhur me ndryshimet në qeveri që do të kalojnë nesër në seancën e jashtëzakonshme.
Kërkesa u bë dje nga kryetari i grupit të PD-së, Enkelejd Alibeaj, por Nikolla nuk e mori në konsideratë. Për këtë arsye, Boçi i kërkon reflektim.
“Rama kërkon të fshehë në çdo mënyrë dështimin e qeverisë së tij të zhytur kokë e këmbë në korrupsion.
Nuk janë vetëm inceneratorët, ferri ku do digjet ai vetë dhe qeveria e tij.
Janë dhe rrugët me kosto të shumëfishuar korruptive.
Janë dhe investimet gjoja strategjike të familjarëve të ministrave të tij, që kanë rrëmbyer pasuritë publike dhe private të shqiptarëve.
Është dhe Butrinti që po i dorëzohet një shqiptarofobi dhe interesave të pista ekonomike.
Për këto arsye Rama kërkon t’i shmanget debatit parlamentar denoncues nesër, për rrokadën e korrupsionit që do bëjë, sa për t’i hedhur hi syve shqiptarëve.
Partia Demokratike kërkon zbatimin e rregullores, ku saktësisht ndryshimi i Keshillit të Ministrave dhe i programit qeverisës, siç e ka shprehur vetë Rama, shoqërohet me debat parlamentar.
Çdo refuzim nga ana e Ramës, nëpërmjet znj. Nikolla, është shkelje e Kushtetutës dhe e rregullores së Parlamentit.
Njëherazi, dëshmon panikun që ka mbërthyer Ramën nga e vërteta e korrupsionit marramendës që ka përfshirë atë dhe qeverisjen e tij.
Rama nuk mund të blejë qetësinë e pushimeve të verës me vrasje debati.
Protestat për rrëzimin e tij do të jenë dhe më të fuqishme” shprehet Boçi.
