Vajzat dhe gratë që janë vaksinuar kundër COVID-19 janë përballur me cikle menstruale që kanë zgjatur për më gjatë.
Por ky ndryshim ka qenë i përkohshëm, sipas një studimi të ri të botuar në revistën BMJ Medicine.
“Krahasuar me grupin e pavaksinuar, individët e vaksinuar kishin një rritje në zgjatjen e ciklit menstrual prej më pak se një ditë me dozat e vaksinës së parë dhe të dytë”, kanë treguar autorët.
“Individët që morën dy doza të një vaksine COVID-19 në një cikël të vetëm kishin një rritje të zgjatjes së ciklit prej 3,70 ditësh krahasuar me të pavaksinuarit”, kanë shtuar ata.
Po ashtu është vënë re një “rritje e konsiderueshme” në shkallën e të anketuarave që kishin një rritje më shumë se tetë ditë në zgjatjen e ciklit.
Autorët e studimit kanë zbuluar se 13.5 për qind e individëve të vaksinuar dhe pesë për qind e pjesëmarrësve të pavaksinuar e raportuan këtë.
“Nuk gjetëm dallime në zgjatjen e menstruacioneve në asnjë grup individësh të vaksinuar, krahasuar me grupin e pavaksinuar”, kanë shtuar ata.
Ndryshimet në zgjatjen e ciklit nuk mbetën në ciklin pas vaksinimit, përveç në grupin që mori dy doza në një cikël. Ato ishin të ngjashme pavarësisht nga vaksina që mori një person.
Në studim u përfshinë rreth 20 mijë njerëz, të cilët regjistruan të dhënat e tyre duke përdorur aplikacionin Natural Cycles midis 1 tetorit 2020 dhe 7 nëntorit 2021.
Pjesëmarrëset ishin nga një sërë vendesh, por kryesisht nga Evropa, SHBA-të dhe Kanadaja. Gati dy të tretat e 15 mijë pjesëmarresve të vaksinuara kishin marrë vaksinën Pfizer/BioNTech.
“Këto gjetje ofrojnë informacion shtesë për këshillimin e grave se çfarë të presin pas vaksinimit”, ka treguar doktoreshë Diana Bianchi.
Sipas saj, ndryshimet pas vaksinimit duken të vogla, brenda intervalit normal të variacionit dhe të përkohshme.