Eksperti i kriminalistikës, Ervin Karamuço ka shpjeguar më detaje profilet kriminale duke filluar nga shkalla e rrezikshmërisë e deri tek taktikat që përdorin. I ftuar në një emision televiziv, Karamuço tregoi se shkalla e rrezikshmërisë së kriminelëve përcaktohet edhe nga mënyra si ata kanë vepruar në vendngjarje dhe intensiteti me të cilin kanë kryer vrasjen.
Sipas tij, kriminelët kategorizohen edhe sipas IQ, duke thënë se një person që ka kryer një vrasje tani nuk është i njëjtë me atë që kryen vrasje pas 10 vitesh, pasi ai ka mësuar më shumë gjatë kësaj kohe.
Eksperti u ndal gjithashtu tek armët e përdorura gjatë sulmeve. Ai zbuloi një detaj të rëndësishëm, që mund të jetë mjaft i rrezikshëm nëse përdoret masivisht nga krimi i organizuar. Karamuço u ndal tek rasti i vëllezërve Gentian dhe Indrit Beqiraj. Ata u arrestuan pak ditë më parë, të cilëve iu gjetën armë të prodhuara me printera 3D.
Ai tregoi se këto armë prodhohen në zonën e Napolit, ku ka veprimtari grupi i Camorra-s. Sipas Karamuços, këto armë prodhohen pa seri dhe mund të jenë edhe replika të armëve të policisë. Ndaj, sipas tij, është e vështirë të zbulohen në rast ngjarjesh kriminale.
Ai shtoi se ministri i Brendshëm vjet shpalosi një strategji për të mos lejuar futjen e këtyre armëve në Shqipëri. Por, sipas tij, ngjarjet e fundit kanë treguar të kundërtën. Karamuço tha se në rast se këto armë përhapen masivisht, atëherë situata do të bëhet shumë e rrezikshme.
