Dy persona janë arrestuar dhe dy të tjerë janë proceduar në gjendje të lirë në kuadër të operacionit “Game over”. Të arrestuarit janë pronarë lokalesh që u kapën duke vendosur baste të paligjshme.
Në përfundim të veprimeve hetimore u arrestuan:
– S. Xh., 56 vjeç, banues në Tiranë, pronar i një lokali në rrugën “Muhamet Deliu”;
– F. S., 48 vjeç, banues Tiranë, pronar i një lokali në rrugën “Tre Dëshmorët”.
Gjithashtu, u proceduan penalisht Xh. A., 20 vjeç, dhe S. S., 17 vjeç, banues në Tiranë.
Sekuestrohen 4 aparate celulare dhe shuma parash, të dyshuara të përfituara nga kjo veprimtari e palejuar.
Pronarët kishin përshtatur lokalet e tyre, për organizimin e lotarive të palejuara, dhe gjatë kontrolleve të ushtruara nga shërbimet e Policisë, S. Xh., F. S., Xh. A., dhe S. S. u kapën në flagrancë duke ushtruar aktivitetin e paligjshëm të lojërave të fatit, nëpërmjet basteve sportive.
Operacioni u finalizua pas sinjalizimit në rrugë operative. Materialet procedurale i kaluan Prokurorisë, për veprime të mëtejshme.
