Gjykatë ruse dënoi sot me burgim të përjetshëm autorin e sulmit të vitit të kaluar në universitetin në qytetin e Permit i cili mori jetën e 6 personave dhe plagosi dhjetëra të tjerë.
19-vjeçari, Timur Bekmansurov u shpall fajtor për masakrën që shkaktoi më 20 shtator 2021.
Mbajtës i licencës për armë zjarri, studenti i drejtësisë shkoi i armatosur në Universitetin e Permit dhe filloi të qëllonte duke përhapur vdekjen.
Disa studentë u hodhën nga dritaret për të shpëtuar veten të tjerët u mbyllën në salla.
6 persona u vranë dhe dhjetëra u plagosën përpara se personi i armatosur të çarmatosej dhe të arrestohej nga policia.
Sipas mediave ruse Bekmansurov u deklarua fajtor duke kërkuar nga gjyqtarët që të mos e dënojnë atë me burgim të përjetshëm.
Vitet e fundit, incidentet e dhunës me armë janë shtuar në Rusi me presidentin Putin duke iu referuar një fenomeni të “importuar” nga SHBA.
Në maj 2021, një 19-vjeçar vrau 9 persona në një shkollë në qytetin e Kazanit. Ai u arrestua dhe u konstatua se kishte patentë për armën gjysmë automatike.
Në tetor 2018, një nxënës i shkollës së mesme vrau 19 persona përpara se të vriste veten në një shkollë të mesme në qytetin Kerch në gadishullin e Krimesë të aneksuar nga Rusia.
