Presidenti i Turqisë, Recep Tayyip Erdogan tha se misionet perëndimore do të “paguajnë” për lëshimin e paralajmërimeve të sigurisë dhe mbylljen e përkohshme të konsullatave në Turqi javën e kaluar, ndërsa policia tha se nuk kishte kërcënim serioz për të huajt pasi arrestoi 15 të dyshuar të Shtetit Islamik të dielën.
Ankaraja thirri ambasadorët e nëntë vendeve të enjten për të kritikuar vendimet e tyre për mbylljen e përkohshme të misioneve diplomatike dhe lëshimin e alarmeve të sigurisë, shkruan Reuters.
Zyrtarët turq thanë se vendet perëndimore, përfshirë Shtetet e Bashkuara dhe Gjermaninë, nuk kishin ndarë informacione për të mbështetur pretendimet e tyre për kërcënim të sigurisë.
“Ditën tjetër, ministria jonë e jashtme i thirri të gjithë ata dhe u dha ultimatumin e nevojshëm, u tha atyre ‘Do ta paguani shumë për këtë nëse vazhdoni kështu’”, tha Erdogani gjatë një takimi me të rinjtë që ishte regjistruar dhe transmetuar paraprakisht të dielën.
Krahas mbylljeve, disa shtete perëndimore paralajmëruan qytetarët për një rrezik të shtuar të sulmeve ndaj misioneve diplomatike dhe objekteve jomyslimane të kultit në Turqi, pas një sërë protestash të ekstremit të djathtë në Evropë në javët e fundit që përfshinin disa incidente të djegies së kopjeve të Librit të shenjtë mysliman, Kurani.
Turqia pezulloi negociatat për pranimin e Suedisë dhe Finlandës në NATO muajin e kaluar pas një proteste në Stokholm gjatë së cilës u dogj një kopje e Kuranit.
