Kuvendi votoi sot rritjen e pagave për administratën, deputetët dhe ministrat. Ndryshe nga grupi i Sali Berishë, pjesa tjetër e PD-së zyrtare votoi pro projektligjit për rritjen e pagave.
Ligji për rritjen e pagave të funksionarëve të lartë, si deputetët, ministrat dhe Presidenti u miratua me 95 vota pro, 3 kundër, asnjë abstenim dhe 5 nuk morën pjesë në votim. Deputetët që votuan kundër ishin Dashnor Sula, Bujar Leskaj dhe Petrit Doda.
Projektligji për rritjen e pagës minimale është miratuar me 97 deputet pro, 0 abstenim, 2 kundër dhe 5 nuk kanë votuar. Ndryshimet në ligjin për “statusin e gjyqtarëve dhe prokurorëve”, kërkonin shumicë të cilësuar prej 84 votash. Në fund kaloi me 93 vota pro duke u rritur pagat edhe gjyqtarëve dhe prokurorëve.
Projektligji u miratua me shpejtësi me qëllim që të dekretohej sot në datë 25 Maj, pasi pasdite presidenti Bajram Begaj niset për në Itali në një vizitë dy ditore.
