Ukraina ka miratuar legjislacionin duke e zhvendosur festën e saj zyrtare të Krishtlindjeve në 25 dhjetor, duke u distancuar nga traditat e Kishës Ortodokse Ruse e lidhur me Putinin, e cila e feston festën më 7 janar.
Presidenti Volodymyr Zelensky nënshkroi ligjin të premten pasi u miratua nga parlamenti i Ukrainës në fillim të këtij muaji.
Ukraina dhe Rusia janë të dyja vende me shumicë ortodokse, por që kur Rusia aneksoi ilegalisht Krimenë dhe filloi të mbështesë separatistët në rajonin lindor të Donbasit të Ukrainës në vitin 2014, një pjesë e madhe e komunitetit ortodoks në Ukrainë është larguar nga Moska.
Lufta e Rusisë në Ukrainë përshpejtoi më tej ndarjen midis dy degëve të krishterimit ortodoks, veçanërisht duke pasur parasysh se kreu i Kishës Ortodokse të Rusisë, Patriarku Kirill, e miratoi plotësisht pushtimin dhe e cilësoi atë si një përplasje kulture midis botës së gjerë ruse dhe vlerave liberale perëndimore.
Ligji i ri do të zyrtarizojë në mënyrë efektive atë që disa kisha në Ukrainë kishin filluar tashmë të praktikonin. Një degë e Kishës Ortodokse të Ukrainës lejoi kishat e saj të festonin Krishtlindjet më 25 dhjetor të vitit të kaluar.
Kisha kryesore katolike greke e Ukrainës tha në shkurt se po kalonte në një kalendar të ri për të festuar Krishtlindjet gjithashtu më 25 dhjetor.
