Negociatat mes opozitës dhe maxhorancës futen në ngërç. Një ditë pasi u dakordësuan parimisht për dy komisione hetimore dhe ngritjen e një nënkomisioni për reformat, palët nuk arritën t’i vënë vulën në Konferencën e Kryetarëve, e parashikuar për t’u mbajtur mesditën e së mërkurës. Konferenca e Kryetarëve u shty me kërkesë të të gjitha palëve, ndërsa Gazment Bardhi sqaroi pas mbledhjes së deputetëve të tij se ku ka ngecur puna, duke mos fshehur dilemën se negociatat edhe mund të dështojnë.
Por kush fiton dhe kush humbet nga kjo marrëveshje? Deputeti i PD-së, Edmond Spaho në një intervistë me “Skype” për “5Pyetjet.al” shprehet se opozita mori dy fitore të mëdha, së pari njohjen nga Edi Rama dhe së dyti nga ndërkombëtarët. Theksoi se kryeministri u detyrua të ulet për shkak të presionit ndërkombëtar dhe se më shumë se komisionet rëndësi ka reforma zgjedhore.
“Thelbi është që Rithemelimi dhe grupi i deputetëve të zotit Bardhi, Partia Demokratike me kryetar Sali Berishën do i themi këtej e tutje, janë pranuar politikisht nga Edi Rama dhe komuniteti ndërkombëtar.
Kjo është arritja më e madhe, sepse në dy vite ne për këtë kemi luftuar që të njihemi si opozita e vërtetë dhe jo ajo e Lulzim Bravës që insistonte Edi Rama. Nga se erdhi kjo? Unë mendoj se erdhi nga 20 shkurti që ka një masë të madhe të pakënaqur, ka arritur pika e vlimit. Kjo masë doli në shesh me thirrjen e Sali Berishës.
Pra rrezikohej i ashtuquajturi stabilitet që është kaq i dashur për ndërkombëtarët dhe së dyti erdhi bashkimi i dy fraksioneve të mëdha. Për rrjedhojë u shtua presion mbi Edi Ramën nga ndërkombëtarët. Ata po bëhen edhe garantë të këtij dialogu dhe u arrit të plotësohen kërkesat legjitime të opozitës.
Më e rëndësishme se komisionet është reforma zgjedhore dhe pritshmëritë për ndryshime të mëdha janë jo realiste, por së paku arritëm të jemi prezent në reformën zgjedhore dhe të mos lejojmë atë që na ndodhi në 2020 të ndryshohej jashtë vullnetit tonë që i dha një avantazh Edi Ramës. Debati jo tetë dhe jo dy komisione nuk është realist.
Në të vërtetë nuk janë tetë komisione, sepse 3 prej tyre janë të kërkuar nga fraksioni i Bashës, janë 5 realisht nga shtatori 2021 deri në tetor 2023. Në më shumë se dy vite. Edhe të na i japësh pesë komisionet nuk i plotësojmë dot me njerëz. U fillua me dy komisione, aq sa kërkuam që janë dy të fundit që janë hedhur poshtë me votë në tetor 2023 për koncesionet në shëndetësi dhe të dhënat qytetarëve” tha ai.
