Agjencia e Mbikëqyrjes Policore njofton se gjatë 3-muajve të parë të vitit 2024 ka pasur 73 referime me 119 punonjës, krahasimisht me të njëjtën periudhë të vitit të kaluar ku ka pasur 41 referime me 66 punonjës të referuar, “çka rezulton se ka një rritje me: 78 % të numrit të referimeve penale, 80.3% të numrit të punonjësve të referuar”.
Sa i përket veprimtarisë parandaluese AMP thotë se rezulton se për periudhën janar-mars 2024, kemi 33 hetime proaktive kundrejt 11 hetimeve proaktive të së njëjtës periudhë të vitit të kaluar ose ndryshe një rritje me 3 herë të numrit të hetimeve proaktive.
Gjithashtu, gjatë këtij 3-mujori të parë të vitit, janë kryer me iniciativë ndalimet/arrestimet në kushtet e flagrancës, si dhe ekzekutuar vendimet e gjykatave për masat e sigurisë të karakterit ndalues dhe shtrëngues të dhëna ndaj 14 punonjësve të strukturave e 5 shtetasve.
