Presidenti amerikan Joe Biden ka paralajmëruar kryeministrin izraelit Benjamin Netanyahu se Shtetet e Bashkuara nuk do të marrin pjesë në asnjë kundërofensivë kundër Iranit pas sulmit masiv me dron dhe raketë të Teheranit në territorin izraelit, thanë zyrtarët.
Kërcënimi i një lufte të hapur mes rivalëve kryesorë në Lindjen e Mesme dhe përfshirja e SHBA-së në të, ka rritur presionin në shumë rajone të botës, duke rritur kështu thirrjet për përmbajtje dhe shmangien e përshkallëzimit të mëtejshëm të situatës. .
SHBA do të vazhdojë të ndihmojë Izraelin të mbrohet, por nuk dëshiron luftë, tha John Kirby, zëdhënës i Sigurisë Kombëtare të SHBA-së, në komentet për transmetuesin ABC.
Mbreti Abdullah i Jordanisë i tha Bidenit përmes telefonit se çdo përshkallëzim nga Izraeli do të zgjeronte konfliktin në rajon, njoftoi media shtetërore e Jordanisë.
Zyrtarët izraelitë kanë thënë se pesë anëtarët e kabinetit të luftës të Izraelit po kërkojnë hakmarrje, megjithëse paneli është i ndarë në kohën dhe shkallën e një përgjigjeje eventuale.
