Zv/kryeministri i Serbisë, Aleksandar Vulin ka shpërthyer ndaj ministres së Punëve të Jashtme të Gjermanisë, Analene Baerbock dhe shtetit të saj pas qëndrimit të Berlinit zyrtar për gjenocidin në Srebrenicë.
Vulin u shpreh se kryediplomatja gjermane është “mbesa e një ish-nazisti të dekoruar nga Hitleri”, e cila po “shantazhon përfaqësuesit e vendeve që nuk do t’i shpallin serbët komb gjenocidal”.
“Ministrja e Jashtme e Gjermanisë, Analena Berbock, mbesa e Valdemarit të dekoruar, ndjekëse e Hitlerit, kërcënon dhe shantazhon përfaqësuesit e vendeve që nuk do t’i shpallin serbët komb gjenocidal. Gjermania, një vend emri i dytë i të cilit është gjenocid dhe holokaust, po përpiqet të vrasë me dhunë ndërgjegjen e botës së lirë. Analena është mbesa e gjyshit të saj, e mësuar të rrinte pa lëvizur përballë pushtetit të Rajhut të Tretë apo Gjermanisë së bashkuar.
Dhe Aleksandar Vuçiq është nipi i gjyshit të tij, i cili u vra nga aleatët gjermanë të ustashëve, dhe Aleksandar Vuçiç nuk do të qëndrojë i qetë para pushtetit gjerman ” theksoi Vulin.
Ai theksoi se presidenti serb Vuçiç “nuk do të qëndrojë pa bërë diçka përballë pushtetit gjerman”.
“Do të mbetet e vërtetë se gjermanët janë komb gjenocidi, kurse serbët jo. Dhe nuk ka forcë që do ta ndryshojë këtë – tha zëvendëskryeministri i Serbisë nga Teherani, ku ka marrë pjesë në ceremoninë mortore të Ebrahim Raisit, Presidentit të vrarë në aksident të Iranit.
