Ministri i Jashtëm turk Hakan Fidan argumenton se kontributi i vendit të tij si për një marrëveshje të mundshme paqeje në Ukrainë, ashtu edhe për rindërtimin e arkitekturës së sigurisë së Evropës është i rëndësishëm dhe se presidenti turk Rexhep Tajip Erdogan ka një vizion për këtë.
Duke folur për gazetarët pas përfundimit të takimit në Londër të vendeve aleate të Ukrainës, Hakan Fidan e cilësoi samitin si të rëndësishëm dhe tha se “në dritën e qëndrimit të marrë nga SHBA në javët e fundit, dhe ndërsa ky qëndrim po bëhet më i qartë, disa pikëpamje të ndryshme janë shfaqur brenda Bashkimit Evropian”.
“Ka diskutime se si liderët evropianë që vizituan së fundmi Shtetet e Bashkuara mund të takohen përsëri dhe të bëjnë atë që munden.” Do të ketë takime të mëpasshme dhe nga sa kuptojmë këto takime do të jenë më të shpeshta. “Është planifikuar që takimet të mbahen në intervale më të shpeshta, ndoshta çdo dy ose tre javë dhe jo çdo dy ose gjashtë muaj”, tha Hakan Fidan.
Sipas kreut të diplomacisë turke, “tashmë dihet se politika e promovuar në Amerikë ka krijuar disa pikëpyetje për liderët evropianë, veçanërisht në lidhje me çështjen e Ukrainës dhe sigurinë evropiane në përgjithësi. “Kjo po diskutohet hapur”.
“Ne do të shohim të gjithë së bashku nëse do të ketë një marrëveshje paqeje në Ukrainë dhe nëse Evropa do të ketë një arkitekturë të re sigurie në këtë kontekst”, shtoi Hakan Fidan.
