Usha Vance, bashkëshortja e Zëvendës Presidentit amerikan J.D. Vance, do të zhvillojë një vizitë zyrtare në Groenlandë nga e enjtja deri të shtunën, për të mësuar rreth trashëgimisë së ishullit dhe për të vizituar garën kombëtare të qenve, Avannaata Qimussersu, në qytetin e Sisimiut.
Vizita e saj ndodh ndërkohë që Donald Trump ka shprehur vazhdimisht dëshirën për të aneksuar këtë territor autonom danez, duke kërkuar që Shtetet e Bashkuara të kenë më shumë kontroll mbi Groenlandën.
Në mes të këtyre zhvillimeve, qeveria amerikane ka kërkuar takime zyrtare me përfaqësuesit e Danimarkës dhe Groenlandës, por këto kërkesa janë refuzuar. Kryeministrja daneze Mette Frederiksen ka theksuar se bashkëpunimi me Shtetet e Bashkuara duhet të jetë në bazë të respektit të sovranitetit dhe vlerave të përbashkëta ndërkombëtare.
