Ditën e sotme bordi i Përbashkët i Mitrovicës ka mbajtuar takimin e parë ku kanë marrë pjesë përfaqësuesit e Mitrovicës së Veriut dhe të Jugut, si dhe anëtarë të qeverisë së Kosovës.
Takimi u kryesua nga ministri në detyrë i administrimit të Pushtetit Lokal, Elbert Krasniqi, në cilësinë e përfaqësuesit të kryeministrit në detyrë, Albin Kurti.
“Përmes bashkërendimit në fusha kyç si infrastruktura, mjedisi, zhvillimi ekonomik dhe shërbimet komunale, ky Bord do të ofrojë një mekanizëm konkret për realizimin e projekteve të përbashkëta dhe ndërtimin e besimit reciprok. Me pjesëmarrje të barabartë nga të dy komunat dhe nën kryesimin e përfaqësuesit të kryeministrit, ky bashkëpunim është dëshmi e përkushtimit ndaj interesit të të gjithë qytetarëve, pa asnjë dallim”, u tha në njoftim.
Kjo mbledhje u mbajt dy ditë pasi Kurti qëndroi në këto dy komuna, ku dhe zhvilloi takime me dy kryetarët.
