Pallati Buckingham konfirmoi se Mbreti Charles do të mirëpresë Presidentin amerikan Donald Trump për një vizitë të dytë shtetërore në Britani më vonë gjatë këtij viti. Kjo është një rast i rrallë, pasi Trump është lideri i parë politik i zgjedhur në kohët moderne që ftohet për dy vizita të tilla nga një monark britanik.
Trump pranoi ftesën në shkurt dhe kjo vizitë pritet të vijë pas asaj të vitit 2019, kur ai u prit nga Mbretëresha Elizabeth II gjatë një vizite shtetërore tre-ditore. Në atë kohë, Trump pati një drekë private me Mbretëreshën dhe një takim çaji me atëherë trashëgimtarin e fronit, Charles.
Fillimisht, ishte planifikuar një vizitë më e shkurtër gjatë verës, por për shkak të vështirësive në përshtatjen e axhendave, është vendosur që të organizohet një vizitë shtetërore më e plotë më vonë gjatë vitit. Ftesa zyrtare nga Mbreti, e njohur si “Manu Regia”, është dorëzuar tashmë në Shtëpinë e Bardhë.
Vizitat shtetërore në Britani përfshijnë ceremoni solemne dhe bankete madhështore, megjithatë ende nuk është vendosur vendi i pritjes për këtë vizitë. Vizitat e mëparshme të Trump në Britani shkaktuan protesta masive dhe angazhime të mëdha të forcave të sigurisë, dhe pritet që edhe kjo vizitë të jetë në qendër të vëmendjes publike.
