Një zjarr i madh ka përfshirë pasditen e sotme zonën naftëmbajtëse në qytetin e Kuçovës, duke alarmuar menjëherë banorët dhe autoritetet lokale.
Flakët u përhapën shpejt në kallamishtet pranë puseve të naftës, duke rrezikuar jo vetëm burimet energjetike por edhe banesat e lagjes përreth.
Falë ndërhyrjes së shpejtë të zjarrfikësve të Kuçovës dhe Beratit, zjarri u vu nën kontroll pas më shumë se një ore betejë me flakët, ndërsa në terren vazhdojnë të monitorohen disa vatra të nxehta pranë puseve të naftës.
Fatmirësisht, nuk raportohet për dëme në infrastrukturën naftëmbajtëse apo banesa, por vetëm për dëme në dy hektarë ferra dhe kallamishte.
