Kryeministri Edi Rama, gjatë një lidhjeje të drejtpërdrejtë në Facebook pas takimit në Vlorë, foli rreth çlirimit të zonave publike të zëna dhe kritikoi ashpër vendimet e disa prokurorëve që, sipas tij, pengojnë interesat e Republikës dhe qytetarëve.
Rama u shpreh se është përballur me një vendim që e ka lënë “pa fjalë” nga prokurorja zonja Gjeli, e cila ka vendosur në sekuestro prona shtetërore, duke penguar zhvillimin e truallit shtetëror në zona të mbrojtura. Kryeministri tha se ka kërkuar nga Ministria e Drejtësisë të ndërmarrë masa ndaj saj, duke e konsideruar të papranueshme sjelljen e një prokuroreje që, sipas Ramës, tradhton interesat e qytetarëve dhe shtetit.
“Çdo prokuror që vepron kundër interesave të Republikës dhe qytetarëve do të përballet me pasoja,” paralajmëroi Rama, duke shtuar se çështja e zonjës Gjeli do t’i përcillet Këshillit të Lartë të Prokurorisë për vlerësim.
Kryeministri theksoi gjithashtu se nuk do të tolerojë paaftësinë apo qëllimet e këqija të atyre që paguhen nga taksat e shqiptarëve dhe minojnë punën e institucioneve për të mbrojtur pronat dhe ligjin.
