Pas riforcimit të sanksioneve të Kombeve të Bashkuara ndaj Iranit për shkak të programit të tij bërthamor, Shtetet e Bashkuara shprehen të gatshme për rifillimin e dialogut me Teheranin.
Sekretari amerikan i Shtetit, Marco Rubio, deklaroi se Presidenti Donald Trump e sheh diplomacinë si rrugën më të mirë për të arritur një zgjidhje, duke theksuar se një marrëveshje do të ishte në interesin e popullit iranian dhe të gjithë botës.
Sipas Rubio-s, Irani duhet të angazhohet në negociata pa vonesa apo kushte, përndryshe komuniteti ndërkombëtar duhet të veprojë me sanksione të menjëhershme për të rritur presionin ndaj regjimit.
Ndërkohë, udhëheqësi suprem i Iranit, Ayatollah Ali Khamenei, ka refuzuar çdo mundësi për bisedime, duke akuzuar SHBA-në për mungesë sinqeriteti.
Marrëdhëniet mes dy vendeve janë përshkallëzuar pas një konflikti të armatosur 12-ditor mes Izraelit dhe Iranit në qershor, ku u goditën objektiva bërthamore iraniane në bashkëpunim me SHBA-në. Përpjekjet e mëparshme për negociata kishin dështuar, pavarësisht dy muajsh dialog intensiv.
