Deputeti demokrat, Klevis Balliu ka reaguar pas atentatit mafioz pranë Rinasit, ku mbeti viktimë Gilmando Dani dhe u plagos rëndë Muçi Shaljani Sheqeri, i cili mësohet se është punonjës i AMP-së.
Ai ka theksuar se ngjarja ka ndodhur vetëm pak minuta pasi përfundoi mbledhja e Komisionit të Punëve të Brendshme, ku opozita kërkoi llogari për mungesën e sigurisë në vend.
“Ministrja, me përbuzje, deklaroi se Shqipëria është vendi më i sigurt dhe me një rritje të vazhdueshme të sigurisë”, u shpreh Balliu.
Më tej ai shkruan se kjo ngjarje tregon qartë se qeveria ka në plan të fsheh të vërtetën, sepse sipas tij, “është bashkëpunëtore e drejtpërdrejtë me ata që kryejnë këto atentate, duke rrezikuar jetën e të gjithë shqiptarëve.”
Reagimi i plotë i Klevis Balliut:
Vetëm 10 minutapas mbylljes së Komisionit të Punëve të Brendshme dhe të Mbrojtjes, ku opozita i kërkonte llogari ministres së Brendshme dhe kupolës së Policisë së Shtetit për mungesën e sigurisë në vend, ministrja, me përbuzje, deklaroi se Shqipëria është vendi më i sigurt dhe me një rritje të vazhdueshme të sigurisë.
Por menjëherë më pas ndodh një atentat mafioz në aeroportin e Rinasit, zonën që supozohet të jetë më e sigurta në Shqipëri.
Ky fakt tregon qartë se qeveria ka në plan të fshehë të vërtetën, sepse është bashkëpunëtore e drejtpërdrejtë me ata që kryejnë këto atentate, duke rrezikuar jetën e të gjithë shqiptarëve.
Kur aeroportet nuk janë të sigurta, kur shkollat nuk janë të sigurta, kur gjykatat nuk janë të sigurta — çfarë mbetet më?
