Policia e Fierit ka vënë në pranga një 57-vjeçar, i cili qarkullonte me armë dhe kishte precedent penal për vrasje.
Bëhet fjalë për Petrit Mernicën, banues në fshatin Sulaj, babai i Azgan Mernicës, i dënuar më parë me burgim të përjetshëm për vrasjen e efektivit Novruz Cenalia në maj të vitit 2024.
Operacioni, i koduar “Pathway”, u zhvillua nga Shërbimet e Forcës së Posaçme Operacionale në bashkëpunim me Seksionin për Hetimin e Krimeve Kundër Personit dhe Komisariatin e Policisë Fier.
Gjatë kontrollit në një lokal në fshatin Fermë Çlirim, Mernica u kap me një pistoletë që mbante në çantën e dorës, e pajisur me dy krëhëra dhe municion luftarak. Arma u sekuestrua dhe i dyshuari u arrestua në flagrancë.
Sipas Policisë, 57-vjeçari kishte qenë më parë i dënuar me 20 vite burg për vrasjen e kunatit të tij.
Ngjarja e fundit rrit shqetësimin për armëmbajtjen pa leje dhe për individët me precedent kriminal që mund të paraqesin rrezik për komunitetin.
Materialet e operacionit janë dërguar në Prokurorinë e Fierit për veprime të mëtejshme ligjore.
