Bordi i Paqes i ngritur nga ish-presidenti amerikan Donald Trump zhvillon sot mbledhjen e tij të parë në Washington, ku për fokus kryesor ka rindërtimin e Rripit të Gazës dhe çështje të tjera ndërkombëtare, si çarmatimi i Hamasit dhe menaxhimi i krizave globale. Takimi ka tërhequr 47 shtete, përfshirë Izraelin, disa shtete arabe dhe vende të tjera, ndërkohë që Bashkimi Evropian do të jetë prezent në cilësinë e vëzhguesit.
Në axhendë janë çështje kyçe që pritet të provojnë efektivitetin e Bordit, përfshirë garantimin e një rrjedhe të pandërprerë të ndihmës humanitare për Gaza dhe ngritjen e një fondi për rindërtimin e enklavës palestineze. Një nga çështjet më të nxehta është çarmatimi i Hamasit, një kusht për të filluar misionin e forcës stabilizuese, i cili pritet të niset së shpejti. Megjithatë, dislokimi i forcës nuk pritet të ndodhë për disa javë ose muaj, për shkak të sfidave të mëdha që lidhen me çarmatimin dhe organizimin e ndihmës.
Pjesëmarrësit e mbledhjes do të diskutojnë gjithashtu një angazhim të mundshëm për mbledhjen e 5 miliardë dollarëve për Gaza, si dhe për angazhimin e “mijëra” ushtarëve që do të marrin pjesë në forcën e stabilizimit. Ky mision i Bordit të Paqes është parë nga disa si një mundësi për të rivalizuar OKB-në, për shkak të rolit të fuqishëm që do të ketë Trump si president i Bordit, duke i dhënë atij mundësinë për të kontrolluar anëtarësimin dhe ftesat për shtetet pjesëmarrëse.
Bordi ka gjithashtu një mandat më të gjerë për të “garantuar paqe të qëndrueshme në zonat e goditura ose të kërcënuara nga konfliktet”, një qëllim që mund të rivalizojë veprimtarinë e OKB-së. Kritikët, megjithatë, shprehin dyshime për mënyrën se si do të funksionojë ky organ, duke e cilësuar si një version me pagesë të Këshillit të Sigurimit të OKB-së.
