Ambasadori i SHBA në Izrael, Mike Huckabee, u ka bërë thirrje shteteve arabe të Gjirit që të “zgjedhin një anë” mes Izraelit dhe Iranit, duke theksuar se lufta e fundit ka treguar qartë se kush është aleati dhe kush kërcënimi në rajon.
“Zgjidhni një anë. Cilën anë do të zgjidhni? Shtetet e Gjirit tani e kanë kuptuar se duhet të bëjnë një zgjedhje. A ka më shumë gjasa të sulmohen nga Irani apo nga Izraeli? Izraeli i ndihmoi, ndërsa Irani i sulmoi”, tha ai.
Diplomati amerikan shtoi se Izraeli nuk është “armiku natyror” i vendeve arabe, duke akuzuar Iranin për destabilizimin e rajonit përmes sulmeve me raketa dhe dronë.
“Izraeli nuk po përpiqet t’ju shkatërrojë, nuk po merr tokat tuaja dhe nuk po dërgon raketa ndaj civilëve tuaj. Kush po e bën këtë? Irani”, u shpreh Huckabee.
