Ish-deputeti i Partisë Demokratike, Ervin Salianji, ka akuzuar drejtuesit e procesit të votimit për kreun e PD-së për manipulim të pjesëmarrjes, duke pretenduar se shifrat e raportuara janë fryrë në mënyrë artificiale në disa degë të vendit.
Sipas tij, në disa zona ka një mospërputhje mes numrit të votuesve të raportuar dhe atyre që kanë marrë realisht pjesë në votim, ndërsa ai veçoi degën e Durrësit si shembull kryesor të kësaj situate.
“Në Durrës unë kam deklaruar ditën që u zhvillua farsa që janë votuar 321 anëtarë nga 939 të deklaruara, flasim për degën Durrës 1. Nga numërimi që i kemi bërë një për një gjatë gjithë orëve, 11 orë, e shikoni sa hyjnë dhe dalin. Kanë votuar gjithsej 269 persona, një pjesë e madhe e tyre kanë shkuar për të votuar kundër. E njëjta situatë në Korçë, janë votuar 165 persona, në Dibër 194, në Lezhë 345, Elbasan 256, Berat 141, Vlorë 210, Fier 220 dhe Shkodër 471”, u shpreh Salianji.
