Presidenti i Shteteve të Bashkuara, Donald Trump, ka deklaruar se ka marrë garanci nga Irani se nuk do të zhvillojë armë bërthamore, në një moment kur raportohen zhvillime të reja në negociatat mes dy vendeve dhe një propozim i ri paqeje i dërguar nga administrata amerikane me kushte më të ashpra.
Megjithatë, procesi mbetet i ndërlikuar për shkak të qëndrimeve të ndryshme të palëve dhe kërkesave të Teheranit për çështje të tjera ekonomike dhe rajonale.
“E vetmja garanci që më duhet është që nuk do të ketë armë bërthamore,” tha Trump në një intervistë televizive, duke shtuar se sipas tij ka një mirëkuptim mes palëve dhe se procesi po ecën “ngadalë por në drejtimin e duhur”. Ai theksoi gjithashtu se çdo marrëveshje e mundshme varet nga ndalimi i plotë i programit bërthamor iranian.
