Greqia ka nisur zbatimin e një marrëveshjeje me Egjiptin që parashikon punësimin e deri në 5,000 punëtorëve sezonalë në sektorin bujqësor, në një përpjekje për të adresuar mungesën e fuqisë punëtore gjatë periudhës së korrjeve.
Programi ka hyrë në fazë zbatimi dhe ka tërhequr interes nga dhjetëra fermerë dhe biznese bujqësore greke, të cilët kërkojnë staf për sezonin e prodhimit.
Punëtorët egjiptianë pritet të angazhohen në kultura të ndryshme si ullinj, agrume, kivi, pjeshkë dhe qershi, duke u shpërndarë në rajone të ndryshme të vendit sipas nevojave të sezonit.
Sipas autoriteteve greke, qëndrimi i tyre mund të zgjasë deri në nëntë muaj, me mundësi për zgjerim të lejeve në të ardhmen. Programi synon të sigurojë një proces të rregulluar dhe ligjor të punësimit, duke i kushtuar rëndësi edhe kushteve të jetesës së punëtorëve.
Kjo nismë shihet si një hap për të stabilizuar tregun e punës në bujqësi dhe mund të shërbejë si model bashkëpunimi me vende të tjera jashtë Bashkimit Evropian.
