Një incident është regjistruar në Sheshin e Flamurit në Vlorë, ku simpatizantët e Partisë Socialiste ishin mbledhur për të pritur kryeministrin Edi Rama pas takimit të tij me banorët e Zvërnecit.
Gjatë aktivitetit, punonjësit e sigurisë kanë ndërhyrë ndaj një qytetareje që mbante një pankartë në mbështetje të protestës kundër investimit në Zvërnec. Sipas pamjeve nga vendi i ngjarjes, pankarta i është grisur dhe asaj nuk i është lejuar të vijojë me mesazhin e saj.
Ndërhyrja ka shkaktuar tension mes punonjësve të sigurisë dhe disa prej të pranishmëve. Qytetarja është shfaqur e prekur emocionalisht, duke deklaruar se nuk po shkaktonte asnjë problem dhe se po i mohohej e drejta për të shprehur mendimin e saj.
