Ndërsa bulevardi kryesor i Tiranës mbushej për të gjashtën ditë me mijëra qytetarë në protesta, Partia Socialiste organizoi festën e saj në Vlorë, duke shpërndarë dekorata për militantët dhe duke treguar forcën e saj.
Tubimi u shoqërua me tension, pasi punonjësit e sigurisë i heqën pankarta disa protestuesve të rinj. Gjatë fjalës së tij, kryeministri Edi Rama foli edhe për projektin e Zvërnecit, duke e lidhur zhvillimin e Vlorës me mesazhe më të gjera për shoqërinë.
“Të thuash ‘Shqipëria e shqiptarëve’ do të thotë t’i bësh thirrje pjesës më të errët të mendjes, burimit të errët të urrejtjes, nxitjeve më të zymta të racizmit, të vetëizolimit dhe mbi të gjitha do të thotë t’i bësh thirrje humnerës. Nuk kanë bërë prokopi popujt që udhëhiqen nga delirantë dhe sharlatanë. Shqipëria vetëm e shqiptarëve ishte kur u bë bunker dhe e dimë si mbaroi ajo histori. Populli mori detet dhe malet i rreckosur, shqiptarët për Shqipërinë, jo Shqipëria e shqiptarëve. Shqipëria e shqiptarëve është si të thuash shtëpia ime është e imja dhe nuk ia hap derën askujt. Çfarë do bësh, do vrasësh veten, do izolohesh? Nuk do zhvillohesh se do flasësh me veten. Shqipëria ka nevojë për respekt, edhe për zërin e hoxhës edhe për zërin e priftit, edhe për ngjyrën e kujtdo që Zoti e ka vendosur kudo në Europë e Amerikë,” tha Rama.
